رباعيات شاهين

من بين شقوق الشيش وشقشقت لك
مع شهقة العصافير وزقزقت لك
نهار جديد انا.. قوم نشوف نعمل ايه
انا قلت يا ح تقتلني.. يا ح اقتلك
عجبي
*******
جالك أوان ووقفت موقف وجود
يا تجود بده ياقلبي.. يا بده تجود
ما حد يقدر يبقى على كل شئ
مع إن –عجبي– كل شئ موجود
عجبي
*******
جالك اوان وعرفت مشي الجنايز
كيف شفتها ياعبد رب اللذايذ
قال: شفت شيل بالحيل فقير أو أمير
كما شالوا في الخمامير فواضي القزايز
عجبي
*******
أنا كنت شئ وصبحت شئ ثم شئ
شوف ربنا.. قادر على كل شئ
هز الشجر شواشيه ووشوشني قال
لابد ما يموت شئ عشان يحيا شئ
عجبي
*******
يامشرط الجراح أمانة عليك
وانت ف حشايا تبص من حواليك
فيه نقطة سوده في قلبي بدأت تبان
شيلها كمان.. والفضل يرجع إليك
عجبي
*******
كيف شفت قلبي والنبي ياطبيب
همد ومات ولاّ سامع له دبيب
قالّي لقيته مختنق بالدموع
ومالوش دوا غير لمسه من إيد حبيب
عجبي
*******
تسلم يا غصن الخوخ يا عود الحطب
بييجي الربيع.. تطلع زهورك عجب
وانا ليه بيمضي ربيع وييجي ربيع
ولسه برضك قلبي حتة خشب
عجبي
*******
قلبي عليل يا ناس وفي الكاس دواه
مديت له إيدي شربت م اللي حواه
جنبي الشمال خف.. اليمين اتوجع
وإيه يداوي الكبد م اللي كواه
عجبي
*******
دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشتا
لكن حاجات أكتر بترفض تموت
عجبي
*******
دي مذكرات وكتبتها من سنين
في نوتة زرقا لون بحور الحنين
عترت فيها.. رميتها في المهملات
وقلت صحيح أما صحيح كلام مخبولين
عجبي
*******